Tramp: Ka shenja përparimi drejt armëpushimit në Liban

 

Komentet e Trampi vijnë në një kohë kur përleshjet mes forcave izraelite dhe luftëtarëve të Hezbollahut vazhdojnë, ndërsa organizata shiite libaneze e ka cilësuar marrëveshjen si një nismë që i shërben vetëm interesave të Izraelit.

 

“Është bërë përparim.”, tha Trampi gjatë një deklarate për mediat, duke shtuar se kishte zhvilluar bisedime si me kryeministrin izraelit Benjamin Netanjahu, ashtu edhe me përfaqësues të Hezbollahut lidhur me mundësinë e një armëpushimi.

 

“Ne morëm një telefonatë nga Hezbollahu dhe ata thanë: ‘Po sikur të ndalemi?’”, u shpreh presidenti amerikan, duke lënë të kuptohet se ka ende hapësirë për dialog pavarësisht tensioneve në terren.

 

Trampi theksoi gjithashtu se konflikti në Liban është i lidhur ngushtë me Iranin, në një periudhë kur Uashingtoni dhe Teherani po japin sinjale të ndryshme mbi ecurinë e kontakteve diplomatike dhe përpjekjeve për uljen e tensioneve në rajon.

 

“Do të ishte mirë nëse Libani do të kishte paqe. Libani ka qenë nën sulm për shumë vite, gjithmonë si pala më e dobët. Do të ishte mirë nëse kjo do të mund të merrte fund.”, deklaroi Trampi.

 

Megjithatë, pavarësisht toneve optimiste nga Uashingtoni, situata në terren mbetet e paqëndrueshme, me sulme të vazhdueshme dhe mungesë konsensusi mbi kushtet e një armëpushimi të qëndrueshëm.