Botë
Irani godet bazat amerikane në Gjirin Persik
10.06.2026 11:05
Konflikti në Lindjen e Mesme ka hyrë në një fazë të re përshkallëzimi...
Konflikti në Lindjen e Mesme ka hyrë në një fazë të re përshkallëzimi, pasi forcat e armatosura iraniane njoftuan se kanë ndërmarrë sulme ndaj bazave ushtarake amerikane në Bahrein dhe Jordani, në atë që Teherani e cilësoi si hakmarrje për bombardimet amerikane ndaj objektivave iraniane pranë Ngushticës së Hormuzit.
Sulmet vijnë vetëm pak orë pasi presidenti i ShBA-së, Donald Tramp, deklaroi se Uashingtoni ishte pranë arritjes së një “marrëveshjeje shumë të mirë” për t’i dhënë fund luftës që shpërtheu më 28 shkurt mes ShBA-së, Izraelit dhe Iranit. Megjithatë, situata u përkeqësua pas raportimeve për rrëzimin e një helikopteri amerikan AH-64 Apache, për të cilin Uashingtoni fajësoi Teheranin.
Sipas Gardës Revolucionare iraniane, në Jordani u goditën katër objektiva të rëndësishëm ushtarakë, përfshirë grupe avionësh luftarakë F-35 dhe një qendër komanduese amerikane në Azraq. Autoritetet jordaneze, nga ana tjetër, deklaruan se kishin interceptuar pesë raketa iraniane dhe se nuk kishte viktima apo dëme materiale.
Ndërkohë, në Bahrein, Garda Revolucionare pretendoi se marina e saj kreu një sulm me dron ndaj Flotës së Pestë të ShBA-së, e vendosur në këtë vend të Gjirit Persik. Nga ana tjetër, Komanda Qendrore Amerikane (CENTCOM) konfirmoi se kishte goditur sisteme të mbrojtjes ajrore, radarë dhe objekte kontrolli pranë Ngushticës së Hormuzit, duke e cilësuar operacionin si një veprim proporcional në vetëmbrojtje pas rrëzimit të helikopterit Apache.
Përshkallëzimi i ri ka ndikuar edhe në tregjet ndërkombëtare. Çmimi i naftës amerikane WTI u rrit me 0.74%, duke arritur në 88.85 dollarë për fuçi, mes shqetësimeve për sigurinë e transportit të hidrokarbureve në Ngushticën e Hormuzit, një nga arteriet më të rëndësishme energjetike në botë.