Thaçi: Kur drejtësia flet, politika duhet të heshtë; Boneva: Procedura duhet të jete sekrete, PSP bën cirk

Pas një ore bisedë informative ,Thaçi nuk deshi të japë detaje, duke deklaruar se kur drejtësia flet, politika duhet të heshtë.  

 

“Kur drejtësia flet, politika duhet të heshtë!”,- tha kryetari i PDSh-së, Menduh Thaçi.

 

Në Prokurorinë Speciale ishte thirrur sot edhe Silvana Boneva nga VMRO-DPMNE, e cila nuk deshi të sqarojë se në çfarë cilësie është marrë në pyetje, por vetëm vlerësoi se kjo është një cirk mediatik dhe politik. 

 

“Kur e votuan në Kuvend ligjin për PSP, në asnjë dispozitë nuk qëndronte se para procedurës hetimore, e cila duhet të jetë e fshehtë, do të jetë një cirk mediatik-politik. Ju jeni dëshmitarë të këtij cirku mediatik dhe politik. Unë jam e bindur se ata që më kanë thirrur do të ju tregojnë se pse më kanë thirrur”- theksoi Silvana Boneva nga VMRO-DPMNE.

 

Në PSP ishte ftuar edhe ministri i Kulturës nga radhët e PDSh-së, Arifikmet Xhemaili, dhe Samka Ibrahimovski nga partia rome, PEPR. 

 

Në javën që lamë pas Specialja paralajmëroi shtim të numrit të personave që do të thirren në cilësinë e dëshmitarëve apo të të hetuarve, me qëllim që sa më shpejt të filtrohen lëndët që ka hapur kjo Prokurori dhe zbulimin e veprimtarive eventuale kriminele dhe korruptive të personave zyrtarë.