Ambasadori Garet: Zgjedhjet shumë të rëndësishme, pres të zbatohen

Ambasadori britanik në Maqedoni, Çarls Garet, nuk ka dashur të shprehet si optimist apo jooptimist lidhur me parashikimet e tij për mbajtjen e zgjedhjeve parlamentare, por, sipas tij, zgjedhjet e caktuara më 11 dhjetor janë shumë të rëndësishme për Maqedoninë dhe beson se ato do të zbatohen.

 

“Nuk do ta përdorja epitetin optimist apo pesimist lidhur me parashikimet e mia për zgjedhjet, do të thosha se jam shumë i kënaqur që u arrit marrëveshje. Ajo prapashtesë të cilën unë do ta përdorja lidhur me zgjedhjet e caktuara për më 11 dhjetor është se janë shumë të rëndësishme për Maqedoninë dhe me të vërtetë mendoj se do të zbatohen",- deklaroi ambasadori i Britanisë në Maqedoni, Çarls Garet.

 

Ndërkaq, ministri i Drejtësisë, Valdet Xhaferi, pranoi se dikasteri që drejton ai ka pranuar njoftimin nga KShZ se njësia zgjedhore numër 6 e tejkalon pragun e paraparë,  i cili sipas nenit 4 të Kodit zgjedhor nuk duhet të kalojë -+5% në raport me numrin e përgjithshëm të votuesve në njësitë zgjedhore. Ai nuk sqaroi se si do të veprohet me këtë njësi zgjedhore, duke paralajmëruar shpjegim gjatë ditëve në vijim.

 

“KShZ deri te Ministria e Drejtësisë e ka dërguar listën zgjedhore. Ditët në vijim do të njoftojë opinionin për hapat e mëtutjeshëm, për hapat që do t’i ndërmerr lidhur me këtë çështje”,- tha ministri i Drejtësisë, Valdet Xhaferi.

 

Këto komente ambasadori Garet dhe ministri Xhaferi i bënë pas nënshkrimit të një memorandumi për bashkëpunim e që ka për qëllim forcimin e kapaciteteve të sistemit gjyqësor në Maqedoni. Sipas ambasadorit Garet, Maqedonisë i nevojitet një sistem gjyqësor tek i cili do të besojnë të gjithë.

 

“Nëse punoni në kuadër të sistemit gjyqësor, kjo do të jetë mundësi të jepni kontribut personal në përforcimin e parimeve kyçe si konsekuencë, koherencë, siguri juridike, parashikueshmëri dhe transparencë. Secili në vend ka interes nëse kemi sistem më të fuqishëm gjyqësor, pasi kjo është me rëndësi kyçe për ndërtimin e demokracisë së fuqishme, shoqërisë së drejtë dhe ekonomisë. Sistem më i fuqishëm gjyqësor do të thotë Maqedoni më e fuqishme”,- theksoi ambasadori i Britanisë në Maqedoni, Çarls Garet.

 

Sipas tij, gjyqësia është gurthemel për cilëndo demokraci, ndërsa sistemi gjyqësor, ku opinioni mund të besojë dhe i cili siguron llogaridhënie kur janë shkelur ligjet dhe punon në interes të të gjithëve, është me rëndësi kyçe për zhvillim të demokracisë, si dhe bazë për një ekonomi të fuqishme.