Vazhdon protesta në Shqipëri, studentët të prerë: Plotësim pa kushte të 8 pikave

Rrëmujë në parlamentin shqiptar, deputeti demokrat gjuan me vezë kryeministrin. Protesta të qytetarëve para parlamentit, kërkojnë kushte më të mira ekonomike.

Studentët në Shqipëri vazhdojnë protestën të cilën e mbështetën edhe prindërit e tyre. Ata këmbëngulin se nuk do të ndalojnë protestat deri në plotësimin pa kushte të 8 pikave. Megjithatë, nesër do të jetë dita e fundit e protestës studentore për këtë vit, për shkak të festave, por studentët do të rikthehen sërish në rrugë më 5 janar nëse deri atëherë qeveria nuk ua plotëson kërkesat.

Protesta e studentëve ka nxehur gjakrat edhe në parlamentin shqiptar, në punimet e të cilit ka marrë pjesë sot edhe opozita pas një bojkoti 6 mujor. Kreu i opozitës, Lulzim Basha, tha se PD u kthye në kuvend për studentët, por kryeministri Rama i përkujtoi opozitës se janë kthyer nga frika se ju digjen mandatet.

Gjatës kohës kur Rama po bënte këto deklarata, deputeti i PD-së, Endri Hasa, u ngrit nga foltorja dhe e qëlloi me vezë. Kjo shkaktoi ndërhyrjen e gardës që rezultoi më pas edhe me përjashtimin e deputetit  për 10 ditë.

Paralelisht me seancën plenare, banorë nga rrethe të ndryshme të Shqipërisë kanë protestuar para parlamentit duke kërkuar kushte më të mira ekonomike dhe uljen e çmimit të karburantit. (Luljeta Ndoka, TVM2)