ShBA përfundon tërheqjen, talebanët festojnë me fishekzjarre në Kabul

 

“Çdo hap që bëjmë do të bazohet jo në atë që thotë qeveria e udhëhequr nga talebanët, por në atë që bën për të përmbushur angazhimet e saj. Talibanët kërkojnë legjitimitet dhe mbështetje ndërkombëtare. Mesazhet tona janë se çdo legjitimitet dhe çdo mbështetje , do të duhet të fitohet.”,- deklaroi sekretari amerikan i shtetit, Antony Blinken.

 

Largimi i amerikanëve, u festua me fishekzjarrë. Udhëheqësit talebanë parakaluan  në mënyrë simbolike pistën e Aeroportit, duke sinjalizuar kështu fitoren e tyre. Talibanët, që kërkojnë njohje ndërkombëtare, u kanë kërkuar të gjitha misioneve të huaja diplomatike të qëndrojnë. Por shumica e vendeve kanë mbyllur ambasadat.

 

“Duke përfaqësuar popullin e Afganistanit, Emirati Islamik i Afganistanit dëshiron të krijojë marrëdhënie pozitive, të forta dhe të qëndrueshme diplomatike me botën, përfshirë SHBA-në. Ne duam të zbusim marrëdhëniet tona me SHBA-në në të ardhmen.”,- tha zëdhënësi i talebanëve, Zambiola Mujahideen.

 

Tani të gjithë sytë janë drejt  mënyrës se si talebanët do ta përdorin  autoritetin e vetëm mbi vendin, me fokus të veçantë  nëse do të lejojnë largimin e atyre që duan të ikin. E ata që duan të ikin janë me mijëra, por ditët e fundit, jo të gjithë janë lejuar t’i afrohen aeroportit. Gjermania po kërkon mënyra për evakuimin e qytetarëve të saj. Ministri i Jashtëm, Maas, po viziton  fqinjët e Afganistanit,  Uzbekistanin, Pakistanin, Katarin dhe Turqinë për të negociuar planet e daljes për stafin lokal në Afganistan dhe grupet e tjera të cenueshme, siç janë aktivistët e të drejtave të njeriut.

 

Këshilli i Sigurimit i OKB-së miratoi një rezolutë të hënën, duke kërkuar që talebanët të respektojnë angazhimin për t'i lënë njerëzit të largohen nga Afganistani dhe për t'i dhënë qasje OKB-së dhe agjencive të tjera të ndihmës. Ende nuk dihet aktualisht kush do ta drejtojë aeroportin e Kabulit. Talibanët i kanë kërkuar Turqisë që të merret me logjistikën derisa ata mbajnë kontrollin e sigurisë, por kjo ofertë ende nuk është pranuar. Nuk është ende e qartë se cilat linja ajrore do të pranonin të fluturonin drejt dhe jashtë  Kabulit, sidomos pas sulmeve të ditëve të fundit të ISIS-it dhe kërcënimeve për sulme të reja.