Kandidaturat e LSDM-së, Zaev: Dimitrievski u vetëpërjashtua. VMRO-DPMNE: LSDM parti e kidnapuar

LSDM nuk ka rikandiduar disa kryetarë aktual të komunave për një mandat të dytë pasi nuk kanë dalë fitues në anketat që ka realizuar partia. Kreu i kësaj partie, Zoran Zaev, tha se rezultate të tilla negative janë shënuar në Radovish dhe Kumanovë dhe prandaj ka kandidatë të të rinj.

Sa i takon largimit të kreut të Kumanovës Maksim Dimitrievski nga anëtarësia e kësaj partie, Zaev tha se ky i fundit me rikandidimin si kandidat i pavarur ka shkelur statutin e partisë dhe është vetëpërjashtuar.

“Maksimi ishte anëtar i Kongresit, sipas funksionit si kryetar edhe anëtar i Këshillit Qendror dhe gjithmonë ka pasur mundësinë që të vijë dhe të shpreh vërejtjet e tij, kështu që e di se si merren vendimet. Vendim i tij që të mos pres LSDM të sjell vendimin dhe para kohe të braktis procesin e selektimit konformë hulumtimit është vendimi i tij dhe me këtë vendim ai morri edhe vendimin për vetëpërjashtim nga LSDM.”,- tha kryetari i LSDM-së, Zoran Zaev.

Pakënaqësitë në LSDM i kanë ardhur në favor opozitës maqedonase. VMRO DPMNE konsideron se LSDM ka probleme të brendshme pasi është e kidnapuar nga kryesia e saj dhe interesat biznesore.

“Kriteret për t’u bërë kandidat për kryetar komune i LSDM-së janë ose je familjar i ndonjërit nga anëtarët e kryesisë të partisë ose të keni relacione biznesore me vëllanë e Zoranit, Vice Zaev.” – thuhet në kumtesën e VMRO DPMNE-së.

Ndërkaq, kreu i VMRO-DPMNE-së, Hristijan Mickovski, shprehu keqardhje që Partia e “E majta” nuk i është bashkangjitur koalicionit të kryesuar nga VMRO-DPMNE kundër LSDM-së. Në një paraqitje mediatike, ftoi votuesit e të Majtës që ta përkrahin VMRO DPMNE-në në ato vende ku kjo e fundit nuk ka kandidat për kryetar komune dhe listë për këshilltarë.

SHPËTIM NUREDINI