Rasti “Parcelat në Vodno”, seanca anulohet me kërkesë të mbrojtjes

Sërish anulohet procesi gjyqësor për rastin “Parcelat në Vodno”, kësaj radhe me kërkesë të mbrojtjes së të akuzuarës, Ratka Kamçeva. Avokati i angazhuar në këtë rast, Zvonko Davidoviq, theksoi se në këto raste palët nuk janë të barabarta, prokuroria është më e privilegjuar ndërsa mbrojtja kritikohet nëse kërkon anulim të seancës.

“Nuk kishte asnjë reagim kur seanca u anulua për shkak të prokurorit, por sot për shkak të angazhimit të njërit nga kolegët që kishte seancë publike u qortuam si mbrojtje se pse e anulojmë lëndën që është në paraburgim, por kjo lëndë gjatë gjithë kohës është e tillë edhe në seancën e kaluar kur u anulua për shkak të prokurorit. Kjo tregon se palët prapë se prapë nuk janë të barabartë në procedurë dhe kemi një palë e cila është shumë më e privilegjuar dhe ka disa të drejta më shumë. Si do të vijojë dhe mbarojë lënda varet prej dëshmive materiale që prokuroria i propozon. Kam thënë posaçërisht për klientin tim rasti është i montuar ku nuk ekziston vepër paraprake penale që të dëshmojë ndihmën përmes larje parash.”,- deklaroi avokati, Zvonko Davidoviq.

Davidoviq shtoi se nuk mund të marrin përsipër mbrojtjen e ndonjë të akuzuari tjetër në rastin kur mungon avokati i tij mbrojtës për arsyen se nuk janë përgatitur dhe nuk kanë shqyrtuar lëndën.

Në këtë rast të akuzuar janë 6 persona, në mesin e të cilëve biznesmeni, Orce Kamçev, dhe nëna e tij, Ratka Kamçeva, Nikolla Gruevski, si dhe ish drejtori i DSK-së, Sasho Mijallkov. Seanca e radhës për këtë rast është caktuar më 10 shtator.

FLORIJE BELULI KAMBERI