Maqedoni
U regjistruan dy nxënës me Covid-19, Filipçe: Numri i nxënësve të infektuar është i vogël
06.09.2021 15:15
Gjatë ditës së sotme janë regjistruar dy raste të nxënësve të infektuar me Covid-19 në një shkollë në Veles...
Gjatë ditës së sotme janë regjistruar dy raste të nxënësve të infektuar me Covid-19 në një shkollë në Veles dhe në një shkollë në komunën e Karposhit në Shkup. Ministri i Shëndetësisë, Venko Filipçe, thotë se numri i nxënësve të infektuar është i vogël. Ai gjithashtu thekson se po ulet edhe numri i infektimeve dhe i kontrolleve mjekësore të Kovid pacientëve përfshi edhe Tetovën dhe Gostivarin, ku gjendja me pandeminë së fundmi ishte më e rënduar. Ministri Filipçe ripërsëriti apelin për respektim të protokolleve shëndetësore.
“Vlerësojmë se me masat aktuale është zvogëluar rreziku, duke marrë parasysh edhe përvojat nga viti i kaluar. Me respektimin e protokolleve fëmijët janë të sigurt. Vazhdojnë trendet e zvogëlimit të shifrave. Po ulen shifrat e infektimeve dhe kontrolleve. Nuk ka numër të lartë të të shtruarve në Spitalin e Tetovës. Të gjitha parametrat tregojnë se situata shkon drejt stabilizimit.”,- tha ministri i shëndetësisë, Venko Filipçe.
Ministri po ashtu bën të ditur se tanimë zyrtarisht është rekomanduar doza e tretë përforcuese e vaksinës për pacientët me imunitet të dëmtuar. Për pjesën tjetër të qytetarëve pritet rekomandimi zyrtar.
“Komiteti ynë për imunizim i pret pikërisht rekomandimet zyrtare për atë pjesë. Doza përforcuese tashmë rekomandohet zyrtarisht për pacientët me imunitet të dëmtuar, ata që janë në dializë kronike, por duhet të kalojë një periudhë prej gjashtë muajsh. Qytetarët mund të paraqiten.”,- u shpreh Filipçe.
Në Universitetin “Shën Kirili dhe Metodi” të enjten hapet pikë vaksinimi për studentët
Vaksinimi në vend po zhvillohet pa ndërprerë dhe pa termine. Deri tani me dy doza të vaksinës janë vaksinuar rreth 570 mijë qytetarë. Të enjten do të hapet një pikë vaksinim edhe për studentët në kampusin e Universitetit “Shën Kirili dhe Metodi” në Shkup.
“Dua t’ua dërgoj këtë mesazh të gjithë të rinjve në vend, bashkëmoshatarëve të mi, që të tregojnë një shkallë të lartë të ndërgjegjësimit, seriozitetit dhe përgjegjësisë kur është fjala për shëndetin publik, të vaksinohen, të mbrojmë veten dhe njerëzit përreth nesh.”,- u shpreh studenti, Ernes Nikoqeviq.
Shkalla e vaksinimit tek të rinjtë është 44%, derisa 53% e qytetarëve mbi 40 vjeç tanimë janë imunizuar.
REJHANE BUSHI METAJ