Filipçe: Në Tetovë humbën jetën 14 persona

 

“Në kovid qendrën në Tetovë në momentin e tragjedisë ishin të hospitalizuar 26 pacientë, personeli mjekësor përbëhej prej dy mjekëve dhe katër infermierëve, 12 pacientë janë evakuuar të sigurt nga Kovid qendra, për momentin janë hospitalizuar në spitalin e Tetovës dhe janë në gjendje stabile, nuk kanë pasoja nga zjarri. Nuk ka të lënduar dhe të vdekur nga personeli mjekësor. Në Institutin e Mjekësisë Ligjore janë dërguar trupat e 14 pacientëve. Për një pjesë të tyre është kryer obduksioni, për një pjesë vazhdon. Të vdekurit janë nga mosha 29 deri në 79 vjeç.”,- deklaroi ministri i shëndetësisë, Venko Filipçe.

 

Po ashtu ministri sqaroi se do të bëhet edhe ADN-ja e tyre për çka janë njoftuar edhe familjarët. Ministri nuk foli për shkaqet e shpërthimit të zjarrit pasi vlerësoi se kjo mund të bëhet pasi të jenë kryer hetimet. 

 

“Ka më shumë spekulime, por lejoni t’i presim gjetjet e hetimeve pasi është shumë me rëndësi atë që e themi në opinion të jetë me të vërtetë e saktë, e kjo është e mundur vetëm pas hetimeve.”,- u shpreh ministri i shëndetësisë, Venko Filipçe.

 

Ministri njëherit mohoi se familjarët kanë qëndruar në spitalin modular për t’i ndihmuar pacientët, ai tha se ata kanë qenë për vizitë, edhe pse ajo nuk është e lejuar. 

 

“Vizitat e pacientëve me kovid në repartet kovid janë të ndaluara gjithkund. Me vaksinimin mjekët në Tetovë i kanë lejuar t’i vizitojnë e jo të kujdesen për ta. Atë e ka menaxhuar personeli mjekësor në tërë territorin e vendit.”,- u shpreh ministri i shëndetësisë, Venko Filipçe.

 

Sa u përket zërave për dorëheqjen e tij ai tha se nuk do të japë dorëheqje deri sa të mbarojë hetimi, që është në rrjedhë e sipër, ndërsa varësisht nga hetimet përgjegjësi do të duhet të mbajë secili, tha ministri.